Home / රූපලාවන්‍ය / නොකඩවා ප්‍රතිකාර කළොත් කුරුලෑ සුව කළ නොහැකිද?

නොකඩවා ප්‍රතිකාර කළොත් කුරුලෑ සුව කළ නොහැකිද?

2018-11-07 10:41:00       45
feature-top
නව යෞවන වියේදී හෝමෝන වෙනස්වීම් සමග කුරුලෑ හට ගැනීම සුලබ සදුවීමකි. එහෙත් යොවුන් විය ඉක්ම ගිය වැඩිහිටියන් අතරද කුරුලෑ හට ගැනීම සිදු නොවනවා නොවේ. එලෙස පසුකාලීනව කුරුලෑ හට ගන්නට සමේ තෙල් නිපදවන ග්‍රන්ථින්හි අධි ක්‍රියාකාරිත්වය එම ග්‍රන්ථි සම මතට විවෘත වීම අවහිර වීම, මැරුණු සම නිසි පරිදි ඉවත් නොවීම වැනි හේතු නිසා බැක්ටීරියා ක්‍රියාකාරිත්වයක් ඇති වී ආසාදනයන් පවා හට ගන්නා අවස්ථා තිබේ.

කුරුලෑ වැඩිපුරම හට ගන්නේ මුහුණේ වුවද පිට, පපුව දෑත ආශ්‍රිතවද කුරුලෑ හටගත හැකියි. බ්ලැක් හෙඩ්ස්, වයිට් හෙඩ්ස් යනු කුරුලෑවක මුල් අවස්ථාවයි. ඉන් පසුව සුදු පැහැ සහ රතු පැහැ බිබිලි ආකාරයටත් එය තවත් වර්ධනය වූ විට විශාල ගෙඩි ආකාරයටත් පැවැතිය හැකිය.

මෙලෙස ඇතිවෙන කුරුලෑ සුව වී ගියද ඉතිරි වූ කැළැල් පහසුවෙන් ඉවත් වී යන්නේ නැත. එහෙත් මුල් අවස්ථාවේදීම කුරුලෑ සඳහා ප්‍රතිකාර ලබා ගත හැකි නම් මුහුණේ සුන්දරත්වයට හානි පමුණුවන කුරුලෑ කැළැල් ඉතිරි වන්නේ නැත.

යොවුන් වියේදී හෝමෝන වෙනස්කම් වලට අමතරව කුරුලෑ හට ගන්නට බලපාන තවත් හේතු කිහිපයකි.
* ඩිම්බ කෝෂ ආශ්‍රිත හෝමෝන අසමතුලිත වීමේ රෝගී තත්ත්වයක් වන ධතරජර ඵබඪජ මචපර ඉරදඤපධථඥ රෝග ලක්ෂණයක් ආකාරයටද තරුණියන්ට කුරුලෑ ඇතිවන අවස්ථා තිබේ. එම රෝගයේ අනෙකුත් රෝග ලක්ෂණ අතර මාසික ඔසප්වීම අක්‍රමවත්වීම, සිරුර අධිකව මහත්වීම, අසාමාන්‍ය ආකාරයට මුහුණේ රෝම වර්ධනය වීම පැවැතිය හැකිය.
* තෙල් සහිත සමක් ඇති අයෙකු මුහුණේ සිදුරු අවහිර වන ආකාරයට අ‍ලේපන ගැල්වීම වැනි සමට නොගැළපෙන ආ‍ලේපන හේතුවෙන්ද කුරුලෑ හට ගන්නා අවස්ථා තිබේ.
ඔසප් ආසන්න වූ විටත් කිරි ආහාර, අධික සීනි අඩංගු ආහාර ගැනීම නිසත් කුරුලෑ තවත් වර්ධනය විය හැකිය.

කුරුලෑ හට ගැනීම කිසිදු ප්‍රතිකාරයක් අවශ්‍ය නොවන සාමාන්‍ය තත්ත්වයකැයි බොහෝ අය තුළ පවතින මතය නිසාය ඒ සඳහා ප්‍රතිකාර නොකිරීම මුහුණේ අශෝභන ලප කැළැල් ඉතිරි වන්නට හේතුවයි. බොහෝ ආසාදිත තත්ත්වයට පත් වූ කුරුලෑ නිසා ඉතිරි වූ කැළැල් සදාකාලිකවම පැවැතිය හැකිය.
එහෙත් කුරුලෑ හට ගත් මුහුණක එබඳු කැළැල් ඇති නොවන්නට කළ හැකි ප්‍රතිකාර ඇති බව බොහෝ අය දන්නේ නැත. අද වන විට ඒ සඳහා ඉතා සාර්ථක ප්‍රතිකාර පැවැතියද එම ප්‍රතිකාර පුද්ගලයාගෙන් පුද්ගලයාට වෙනස් විය හැකි නිසා හිතුමතේ ප්‍රතිකාර කරා යොමු වීම කිසිසේත් සුදුසු නොවේ. තමන් දන්නා අයෙකුට ඉතා සාර්ථක වූ ප්‍රතිකාරයක් ඔබට එලෙසින් සාර්ථක ප්‍රතිඵල ලබා නොදිය හැකියි. එය සම පිළිබඳ අධ්‍යයනයකින් පසුව සංකූලතා හා වෙනත් රෝග තත්ත්වයන් පිළිබඳවත් අවධානය යොමු කරමින් වෛද්‍ය නිර්දේශ මත සිදුකළ යුතු ප්‍රතිකාරයකි.
බ්ලැක් හෙඩ්ස් හෝ වයිට් හෙඩ්ස් ආකාරයට කුරුලෑවක් එහි මුල් අවදියේ පවතින විටදී ඒ සඳහා යම් ආ‍ලේපනයක් ප්‍රමාණවත් විය හැකිය. එහෙත් එය ඉන් එහා වර්ධනය වී ආසාදිත තත්ත්වයට පත්වූ විටදී ප්‍රතිජීවක ඖෂධය වැනි ශරීර අභ්‍යන්තරයට පවා ප්‍රතිකාර කරන්නට සිදුවේ.
කුරුලෑ සඳහා කරන ප්‍රතිකාර වලින් යම් ප්‍රතිඵලයක් දැක ගන්නට නම් අඩුම තරමින් මසක පමණ කාලයක් ගත විය හැකිය. සතියෙන් හෝ දෙකෙන් කුරුලෑ සුව වූ ලප කැළැල් නැති සමක් මෙම වෛද්‍ය ප්‍රතිකාර වලින් බලා‍පොරොත්තු විය නොහැකිය. සමහර තරුණියන් තම විවාහයට සති දෙකක් තිබියදී කුරුලෑ සුවකර ගන්නට ප්‍රතිකාර සොයා පැමිණෙන අවස්ථා තිබේ. එහෙත් එවැනි අවශ්‍යතා ඇති කෙනෙකු මාස හයකටවත් පෙර දී කුරුලෑ ප්‍රතිකාර ආරම්භ කළ යුතුය.

කුරුලෑ සඳහා කරන ප්‍රතිකාරවලින් ප්‍රතිඵලය අත්විඳින්නට මාස තුනේ සිට හය අතර කාලයක් ගත විය හැකිය. එලෙස ප්‍රතිකාර කළ යුතු කාලය වෛද්‍යවරයා විසින් ගතයුතු තීරණයකි. තවත් සමහරුන් එක් වරක් පමණක් ප්‍රතිකාර ගෙන සෑහීමකට පත්වී නැවත ප්‍රතිකාර මතක් වන්නේ නැවත කුරුලෑ වර්ධනය වන්නට පටන් ගත් විටයි. කුරුලෑ සම්පූර්ණයෙන්ම සුවකර ගන්නට නම් වෛද්‍ය උපදෙස් මත අදාළ කාලසීමාව පුරාම ප්‍රතිකාර ගැනීම අත්‍යවශ්‍ය වන්නකි.

කුරුලෑ සුව වන විටදී පැහැපත් සමක් ඇති අයෙකුගේ මුහුණේ රතු පැහැති කැළැල් හෝ පැහැපත් නැති මුහුණක කළු පැහැති කැළැල් ඉතිරි විය හැකිය. එහෙත් එම කළු පැහැ හෝ රත් පැහැ කැළැල් කාලයත් සමග ඉබේම සුව වී යන අතර යම් ආලෙප්නයක් ගැල්වීමෙන් ඉතා කෙටි කාලයකින් එම කැළැල් මකා ගත හැකිය.
කුරුලෑ මර්දනයට මෙන්ම ලප කැළැල් මකා ගන්නට හෝ වළ සහිත කැළැල් වල ගැඹුර අඩු කර ගන්නට දැන් සාර්ථක ප්‍රතිකාර තිබේ. මුහුණේ සුන්දරත්වයට වැඩි හානියක් පමුණුවන මුහුණේ වලවල් ආකාරයේ කැළැල් හට ගැනීම නතර කිරීම ප්‍රධාන වශයෙන් වෛද්‍ය ප්‍රතිකාර වලින් බලා‍පොරොත්තු වේ. කුරුලෑ ආසාදනය වී යටට පැතුරුණු වලවල් ඇති නම් ඒවායේ ගැඹුර අඩුකර ගන්නට විවිධ ප්‍රතිකාර තිබුණද ඒ සදහා දීර්ඝ කාලයක් ගතවේ. එය මාස හයේ සිට අවුරුද්දක් දක්වා වියහැකිය. එම කාලය කුරුලෑ කැළැල්වල ගැඹුර මත තීරණය වන්නකි.

එතරම් ගැඹුරට විහිදී නැති සුළු කැළැල් සඳහා කෙමිකල් පීලිං නමින් හැඳින්වෙන ප්‍රතිකාර ක්‍රමයත් ඊට වඩා තරමක් ගැඹුරු කැළැල් සඳහා ‍ලේසර් ප්‍රතිකාරයක් සිදුකරයි. වඩාත් ගැඹුරට විහිදුණු කැළැල් සඳහා එම ප්‍රතිකාර ක්‍රම දෙක සාර්ථක නොවන නිසා ඒ සඳහා රුධිර පට්ටිකා එන්නත් කරන වෙනත් ප්‍රතිකාර ක්‍රමයක් භාවිතා කරන්නට සිදුවේ. සමහර පුද්ගලයන්ගේ මුහුණේ ඈතට පෙනෙන තරමේ ගැඹුරු කැළැල් යම් පමණකට නොපෙනෙන ආකාරයට සුවකර ගන්නට මෙවැනි ප්‍රතිකාර ඉතා සාර්ථක වුවද එවැනි කැළැල් සහමුලින්ම මකා දැමීමට නම් හැකියාවක් නැත.
තරුණ කාලයේ හටගත් කුරුලෑ නිසා ඇති වූ නොමැකෙන කැළැල් නිසා පීඩා විඳින වැඩිහිටියන්ට වුවද මෙවැනි ප්‍රතිකාර ක්‍රම වලින් ප්‍රතිඵල ලබා ගන්නට හැකියාව තිබේ.

උත්පලා  සුභාෂිනී ජයසේකර
චර්ම රෝග විශේෂඥ වෛද්‍ය නයනි මාරසිංහ
අවධාරණය කරයි

(under the courtesy of hirutv.lk blog web)

More News »